విరాట్‌ కోహ్లీకి భారతరత్న ఇవ్వాలి.. రైనా డిమాండ్

భారత క్రీడా చరిత్రలో ఇప్పటివరకు భారతరత్న అవార్డుతో గౌరవించబడిన ఏకైక క్రీడాకారుడు క్రికెట్‌కు మాస్టర్‌ బ్లాస్టర్‌గా పేరుగాంచిన సచిన్ టెండూల్కర్ మాత్రమే. 2014లో కేంద్ర ప్రభుత్వం సిఫార్సు చేయగా, అప్పటి రాష్ట్రపతి ప్రణబ్ ముఖర్జీ ఆయనకు ఈ అత్యున్నత పౌర పురస్కారాన్ని అందజేశారు.

ఇదిలా ఉండగా, ఇటీవల టెస్టు క్రికెట్‌కు గుడ్‌బై చెప్పిన స్టార్ బ్యాట్స్‌మన్ విరాట్ కోహ్లీకి భారతరత్న ఇవ్వాలని భారత మాజీ ఆటగాడు సురేశ్ రైనా అభిప్రాయపడ్డాడు. ఒక టెలివిజన్ చర్చలో పాల్గొన్న రైనా, "విరాట్ దేశ క్రికెట్‌కు చేసిన సేవలు అమోఘం. అతని నాయకత్వంలో జట్టు ఎన్నో విజయాలు సాధించింది. అలాంటి ప్రతిభావంతుడికి భారతరత్న ఇవ్వడం సముచితమే" అని వ్యాఖ్యానించాడు.

కొద్దిరోజుల క్రితమే తన 14 ఏళ్ల టెస్టు ప్రయాణానికి ముగింపు పలుకుతూ కోహ్లీ భావోద్వేగపూరితంగా స్పందించాడు. సోషల్ మీడియా వేదికగా చేసిన ప్రకటనలో, భారత్ తరఫున టెస్టుల్లో ప్రాతినిధ్యం వహించడాన్ని గర్వంగా భావిస్తున్నానన్నాడు. “ఈ ప్రయాణాన్ని ఎప్పుడూ గౌరవంగా గుర్తుంచుకుంటాను” అని పేర్కొన్నాడు.

విరాట్ టెస్ట్ ఫార్మాట్‌లో ఇప్పటివరకు 123 మ్యాచ్‌లు ఆడి, 9,230 పరుగులు సాధించాడు. ఇందులో 30 శతకాలు నమోదయ్యాయి. గతేడాది టీ20 ఫార్మాట్‌కు రిటైర్మెంట్ ప్రకటించిన కోహ్లీ, ఇప్పుడు వన్డేలకు మాత్రమే అందుబాటులో ఉన్నాడు. 2027 వన్డే వరల్డ్‌కప్ కోసమే తన దృష్టి సారించనున్నట్లు సమాచారం.

కెప్టెన్ రోహిత్ శర్మ కూడా టెస్టులకు వీడ్కోలు ప్రకటించిన కొద్ది రోజులకే కోహ్లీ తీసుకున్న ఈ నిర్ణయం చర్చనీయాంశంగా మారింది. క్రికెట్ రంగంలో విరాట్‌ చేసిన విశేష కృషిని భారత ప్రభుత్వం గౌరవిస్తుందా? భారతరత్న పిలుపు నెరవేరుతుందా? అన్నది వేచి చూడాల్సిందే.