బాలయ్య, క్రిష్ కాంబో రీ ఎంట్రీకి గ్రీన్ సిగ్నల్.. ఇంతకీ అదేంటంటే

చాలా కాలంగా హరిహర వీరమల్లూలో చిక్కుకుపోయిన దర్శకుడు క్రిష్‌ ఇప్పుడు ఆ ప్రాజెక్ట్ నుంచి బయటపడి, అనుష్కతో కలిసి ఘాతి అనే మహిళా ప్రాధాన్య చిత్రం తెరకెక్కిస్తున్నారు. ఇది చిత్రీకరణ దశలో ఉండగానే, ఆయనకు మరో భారీ అవకాశం సమీపిస్తోంది. అదే నందమూరి బాలకృష్ణతో కలసి చేయబోయే ఆదిత్య 999.

ఇది ఆదిత్య 369కి కొనసాగింపుగా రూపొందే ప్రాజెక్ట్. బాలకృష్ణ ఈ సినిమాను స్వయంగా డైరెక్ట్ చేయాలనే ఆలోచనలో ఉన్నప్పటికీ, రాజకీయాల మధ్య డైరెక్షన్‌కు సమయం కేటాయించడం కష్టంగా మారింది. ఈ నేపథ్యంలో దర్శక బాధ్యతలు క్రిష్‌కి అప్పగించే దిశగా చర్చలు సాగుతున్నట్లు సమాచారం.

 ఈ సినిమాకు వేటరన్ డైరెక్టర్ సింగీతం శ్రీనివాసరావు దార్శనికంగా సహకరించినప్పటికీ, వయసు పరిమితుల కారణంగా ఆయన ఈ ప్రాజెక్ట్‌కు పూర్తిగా దూరమయ్యారు. ఇప్పుడు బాలకృష్ణ టెంప్లేట్‌ను అర్థం చేసుకొని పనిచేయగల డైరెక్టర్‌గా క్రిష్‌ పేరు ముందుకు వస్తోంది.

 ఈ సినిమాలో నందమూరి వారసుడు మోక్షజ్ఞ  కనిపించనున్నారన్న వార్త చక్కర్లు కొడుతుంది. ముందుగా ఆదిత్య 999తోనే మోక్షజ్ఞ తెరపైకి రావాల్సి ఉండగా, ఆ ప్రణాళిక కొంత కాలం ఆలస్యం అయింది. ఇక ఇప్పుడు అదే ప్రాజెక్ట్ ద్వారా ఆయన ఎంట్రీ ఉండే అవకాశాలు మెరుగ్గా కనిపిస్తున్నాయి.

 ఈ ప్రాజెక్ట్‌ను నిర్మించబోయే సంస్థగా ఆర్కా మీడియా ముందున్నట్లు వార్తలు వినిపిస్తున్నాయి. ఇప్పటికే బాహుబలి వంటి మల్టీ-లెవెల్ సినిమాలతో పేరుగాంచిన ఆ సంస్థ, ఈ సైన్స్ ఫిక్షన్ తరహా ప్రాజెక్ట్‌ను మరింత ప్రాముఖ్యంగా హ్యాండిల్ చేయనుంది.